Sigmundur Davíð Gunnlaugsson ræddi Icesave-deiluna á Alþingi fyrir stundu. mbl.is/Árni Sæberg

ESA, Eftirlitsstofnun EFTA, mun hætta að skamma Íslendinga fyrir framferði þeirra í Icesave-deilunni samþykki þeir nýja Icesave-samninginn, að mati Sigmundar Davíðs Gunnlaugssonar, formanns Framsóknarflokks, í fyrra andsvari við ræðu Steingríms J. Sigfússonar fjármálaráðherra um Icesave-málið.

Sigmundur Davíð spurði Steingrím um framgöngu um ESA í Icesave-deilunni.

Steingrímur kvaðst þá fagna þeirri niðurstöðu ESA að neyðarlögin sem Alþingi samþykkti eftir hrunið væru réttmæt.

Sigmundur Davíð ítrekaði að rétt væri að gera athugasemdir við að ESA skyldi hafa tekið þátt í að kúga Íslendinga í deilunni. Það að ESA skuli gefa til kynna að Íslendingum verði veitt „sakaruppgjöf“ gegn því að samþykkja nýja samninginn væri til vitnis um óeðlilega framgöngu ESA. Hann vitnaði til þess mats norska lagaprófessorsins Peter Ørebech að form samningaviðræðnanna í Icesave-deilunni væri óeðlilegt. Ekki ætti að ræða slíkt mál í bakherbergjum, í ljósi þess að málið varðaði regluverk Evrópusambandsins.

Svaraði Steingrímur því þá til að enginn vafi léki á lagalegum rétti ríkisstjórnarinnar til að semja um málið. 

Siv Friðleifsdóttir situr í stól þingforseta en hún hefur ítrekað beðið þingmenn um að láta af fram í köllum úr sal.

Höskuldur Þór Þórhallsson, þingmaður Framsóknarflokks, vísaði því stöðumati Steingríms á bug að ytri þættir hefðu breyst í Icesave-deilunni, sem yrði að taka til hliðsjónar við sanngjarnt mat á málsmeðferðinni. Höskuldur Þór taldi þvert á móti að staðan hefði breyst vegna baráttu óháðra samtaka og stjórnarandstöðunnar.