Allt að 160% verðmunur var á nýjum jólabókum þegar verðlagseftirlit ASÍ kannaði verð í 12 verslunum víðsvegar um landið sl. þriðjudag. Skoðað var verð á 43 algengum bókatitlum. Algengast var að fjórðungs til helmings verðmunur væri á milli verslana.

Lítill munur milli Bónus og Krónunnar

Bónus var oftast með lægsta verðið á 17 titlum, en einnar krónu verðmunur var á Bónus og Krónunni á 9 af 10 bókatitlum sem til voru í báðum verslunum.  Mál og menning Laugavegi og Penninn Eymundsson Kringlunni voru oftast með hæsta verðið í 12 tilvikum, en Bóksala stúdenta var næst oftast með hæsta verðið eða í 10 tilvikum.

Allir 43 titlarnir sem skoðaðir voru í könnuninni voru fáanlegir í Mál og menningu, Pennanum-Eymundsson og Griffli, í Hagkaupum voru 42 titlar fáanlegir, í A4 voru 41 titill fáanlegur og Bóksala stúdenta var með 40 titla. Fæstir titlar í könnuninni voru fáanlegir í Krónunni Reyðafirði og Office 1 á Egilsstöðum.

Mestur verðmunur í könnuninni var á barnabókinni „Skúli skelfir fer í frí“ sem var á lægsta verðinu hjá Nettó á 1.031 kr. en dýrust hjá Hagkaupum á 2.680 kr. sem er 160% verðmunur eða 1.649 kr.

Athugasemd frá Hagkaup sett inn kl: 10:41 

Bókin Skúli skelfir fer í frí hefur aldrei verið seld á 2.680 krónur í verslunum Hagkaups samkvæmt upplýsingum frá framkvæmdastjóra Hagkaups. Heldur hefur bókin kostað, frá því hún kom í sölu, 2.290 krónur sem er sama verð og hjá flestum bóksölum.

Minnsti verðmunurinn í könnuninni var á „Furðuströndum“ eftir Arnald Indriðason sem var á lægsta verðinu hjá Nettó á 3.471 kr. en dýrust á 3.983 kr. í Bóksölu stúdenta sem er 15% verðmunur eða 512 kr.

Könnunin var gerð í eftirtöldum verslunum : Máli og menningu Laugavegi, Pennanum-Eymundsson Kringlunni, Bóksölu stúdenta Sæmundargötu, Griffli Skeifunni, Office 1 Egilsstöðum, Nettó Mjódd, Hagkaup Smáralind, Bónus Ísafirði, Krónan Reyðafirði, A4 Smáratorgi, Iðu Lækjargötu og Samkaupum Úrval Egilsstöðum.

Sjá nánar á vef ASÍ