mbl.is/GSH

Hæstiréttur hefur staðfest dóm yfir karlmanni sem var dæmdur í tveggja ára fangelsi í Héraðsdómi Reykjavíkur fyrir að hafa orðið valdur að eldsvoða sem hafði í för með sér almannahættu. Maðurinn játaði sök.

Maðurinn var sakfelldur í héraði í byrjun árs fyrir að hafa hellt bensíni úr brúsa inn í og á bifreið sem stóð á bifreiðarstæði við Leifsgötu í Reykjavík. Hann kveikti í bensíninu og olli með því eldsvoða sem hafði í för með sér almannahættu.

Fram kemur í dómi Hæstaréttar að eldurinn hafi breiðst út með þeim afleiðingum að tvær bifreiðar brunnu og sú þriðja stórskemmdist. Þá komu sprungur komu í rúður á 1. og 2. hæð húss sem stóð við bílastæðið.

Í dómi Hæstaréttar segir að það hljóti að hafa verið manninum ljóst að íkveikjan myndi hafa í för með sér augljósa hættu á yfirgripsmikilli eyðingu á eignum annarra manna.

Fengnir voru matsmenn sem komust að þeirri niðurstöðu, að telja mætti öruggt að íkveikjan hafi leitt til almannahættu að því er varðaði umfangsmikla eyðingu á tveimur bílum og einnig á húseigninni og lausafjármunum í Leifsgötu 22 hefði eldurinn brunnið áfram og borist inn í húsið í kjallara og á 1. hæð.  Hins vegar töldu matsmennirnir ekki, að íbúar í húsinu og næsta húsi hafi verið í hættu. 

Með hliðsjón af alvarleika brotsins þótti ekki tilefni til að skilorðsbinda refsinguna. Maðurinn hefur áður verið níu sinnum sektaður fyrir umferðarlagabrot og þrisvar sinnum sviptur ökurétti.  Eftir að hann kveikti í bílnum var hann sektaður fyrir skemmdarverk og í maí á síðasta ári var hann dæmdur í 45 daga fangelsi fyrir ölvunarakstur og réttindaleysi við akstur og sviptur ökurétti í 3 ár og 6 mánuði.