Frá Alþingi.

Róbert Marshall, formaður allsherjarnefndar Alþingis, sagði þegar hann  mælti fyrir frumvarpi  um veitingu ríkisborgararéttar á þingfundi í gær, að sérstök sjónarmið lægju til grundvallar hverri ákvörðun um ríkisborgararétt og þau mynduðu ekki fordæmi.

Meðal þeirra 43 einstaklinga, sem Alþingi samþykkti að veita íslenskan ríkisborgararétt, var mánaðargamall drengur, sem indversk staðgöngumóðir eignaðist fyrir íslensk hjón en staðgöngumæðrun er ólögleg hér á landi. 

Að frumvarpinu stóðu allir þingmenn, sem eiga sæti í allsherjarnefnd, nema Vigdís Hauksdóttir, þingmaður Framsóknarflokks. Vigdís tók ekki þátt í atkvæðagreiðslu um málið á þingfundi.

Róbert sagði, þegar hann  mælti fyrir frumvarpinu, að í allsherjarnefnd sé unnið með miklar persónuupplýsingar og því „mjög mikilvægt að nefndarmenn einstakir tjái sig ekki um einstök mál í þessu tilliti. Þau eru hver um sig sérstök og sérstök sjónarmið sem gilda og liggja til grundvallar hverri ákvörðun og þau mynda ekki fordæmi,“ sagði Róbert m.a. í tveggja mínútna langri framsöguræðu sinni.

Alþingi afgreiddi frumvarpið snaggaralega. Málsmeðferðin með framsögu og atkvæðagreiðslum stóð frá kl. 14.34 til klukkan 14.40 eða í sex mínútur. Á þeim tíma var þremur fundum Alþingis slitið, tveir settir og fimm atkvæðagreiðslur fóru fram. Frumvarpið var samþykkt sem lög frá Alþingi með 50 samhljóða atkvæðum.