mbl.is/Júlíus

Gæsluvarðhald yfir þremur mönnum sem frömdu vopnað rán á Selfossi fyrir rúmri viku rann út í dag. Mennirnir sitja hins vegar enn inni á Litla-Hrauni vegna annarra dóma sem þeir hafa hlotið, en skv. upplýsingum lögreglu voru tveir þeirra á reynslulausn og hafði sá þriðji hlotið dóm í Hæstarétti í síðustu viku.

Mennirnir eru síbrotamenn að sögn lögreglu og höfðu tveir þeirra framið annað rán á Selfossi nokkrum dögum áður en þeir réðust ásamt þriðja manni inn á heimili fólks í bænum 11. desember sl. og ógnuðu því með hnífum.

Að sögn lögreglunnar á Selfossi var tveimur þeirra veitt reynslulausn nýverið en þá áttu þeir eftir að afplána nokkra mánuði enn vegna fyrri dóma, annar þeirra rúma átta mánuði en hinn rúma sex.

Þremenningarnir voru handteknir um þarsíðustu helgi. Tveir á Selfossi og sá þriðji við Rauðavatn. Lögreglan á Selfossi naut aðstoðar sérsveitar ríkislögreglustjóra og lögreglunnar á höfuðborgarsvæðinu.

Að sögn lögreglu hefur mikil vinna verið lögð í rannsókn málsins. Meðal annars að gera kröfu um að þeir yrðu úrskurðaðir í gæsluvarðhald og kröfu um að reynslulausn verði dæmd upp hafa lögreglumenn staðið í ströngu að yfirheyra, afla gagna og vinna úr þeim.

Við rannsókn málsins kom fram að tveir mannanna höfðu framið annað rán nokkrum dögum áður. Það átti sér einnig stað á Selfossi. Sá sem var rændur varð svo óttasleginn eftir hótanir mannanna að hann þorði ekki að kæra.