mbl.is/ÞÖK

Umboðsmaður Alþingis beinir þeim tilmælum til dómsmálaráðuneytisins að það taki umsókn konu um íslenskan ríkisborgararétt til endurskoðunar, komi fram beiðni þess efnis frá henni. Það er niðurstaða umboðsmanns að það hafi ekki verið í samræmi við lög að synja umsókn hennar í apríl í fyrra. 

Fram kemur í nýju áliti að afstaða ráðuneytisins um að konan hafi ekki uppfyllt lagaleg skilyrði til að öðlast íslenskan ríkisborgararétt fyrr en hún hefði dvalið hér á landi samfellt í fjögur ár hafi ekki verið í samræmi við lög.

Konan leitaði til umboðsmanns Alþingis í framhaldinu og kvartaði yfir ákvörðuninni. Fram kemur í álitinu að konan hafi komið fyrst til landsins 13. október 2005 á grundvelli vegabréfsáritunar og hafi gengið í hjónaband 22. október sama ár. Þá hafi hún sótt um dvalarleyfi sem maki Íslendings 9. nóvember 2005, fengið útgefið dvalarleyfi 6. apríl 2006 og hafi haft dvalarleyfi hér á landi frá þeim tíma.

Þá segir að umsóknin hafi verið synjað á þeim grundvelli að konan hafi ekki uppfyllt búsetuskilyrði laga um íslenskan ríkisborgararétt.

Athugun setts umboðsmanns á málinu beindist annars vegar að því hvort ráðuneytið hefði miðað upphaf búsetu konunnar á Íslandi við rétt tímamark. Hins vegar beindist athugunin að því hvort synjun umsóknarinnar á þeim grundvelli að konan hefði ekki dvalist hér á landi samfellt í fjögur ár á grundvelli dvalarleyfis og því ekki uppfyllt skilyrði til að fá útgefið búsetuleyfi hefði verið í samræmi við lög.

Álit umboðsmanns Alþingis.