Vélar Icelandair fóru tvær ferðir til Heathrow-flugvallar í dag.

Flug um Keflavíkurflugvöll er að mestu komið á áætlun en flug fór verulega úr skorðum undanfarna daga vegna slæmra veðurskilyrða víða á evrópskum flugvöllum. „Þeir sem hafa lent í töfum eru meira eða minna að komast á leiðarenda núna,“ segir Guðjón Arngrímsson,  upplýsingafulltrúi Icelandair.

„Þetta er að koma heim og saman,“ segir Guðjón en vélar félagsins fóru tvær ferðir til Heathrow flugvallar í dag samkvæmt áætlun og áætlunarflug til annarra áfangastaða var að mestu með eðlilegum hætti.

Enn er ástandið þó slæmt á  Heathrow flugvelli þar sem mjög lítið hefur verið hægt að fljúga undanfarna daga og umferð um flugvöllinn enn takmörkuð en Guðjón segir þó góðar vonir um að flug Icelandair til Bretlands og annarra áfangastaða í Evrópu eigi að geta verið samkvæmt áætlun á morgun. Hvetur hann þó farþega og aðstandendur þeirra að fylgjast vel með flugáætlunum félagsins.