Beðið á Heathrow flugvelli í Lundúnum Reuters

Ekki er allt flug komið á áætlun um Keflavíkurflugvöll en nánast allt flug fór úr skorðum vegna slæmra veðurskilyrða víða á evrópskum flugvöllum á sunnudag og í gær. Vél Iceland Express sem koma átti frá Kaupmannahöfn um miðnætti lendir væntanlega ekki fyrr en síðdegis og hið sama á við um vél félagsins sem átti að koma um miðnætti frá Berlín en hún er væntanleg hingað klukkan 17:20.

Vél Iceland Express sem átti að fara til Kaupmannahafnar klukkan 7 í morgun fer ekki fyrr en síðdegis en annað flug frá landinu virðist vera nokkurn vegin á áætlun. Að vísu er flugvél Iceland Express sem fara átti til Las Palmas klukkan 9:40 ekki væntanleg í loftið fyrr en klukkan 14:40.

Tugir þúsunda flugfarþega hafa ekki komist á áfangastað víðsvegar um Evrópu vegna snjókomu og ísingar undanfarna daga.

Ástandið er mjög slæmt á  Heathrow flugvelli í Lundúnum þar sem mjög lítið hefur verið hægt að fljúga. Þar báðu flugvallaryfirvöld fólk um að halda sig fjarri flugvellinum í gærkvöldi þar sem hann væri yfirfullur.

Aflýsa þurfti yfir 1.000 flugferðum á þýskum flugvöllum og á Charles de Gaulle hefur fjölmörgum flugferðum verið aflýst en á Orly flugvelli í París hefur verið hægt að fljúga en miklar tafir eru á öllu flugi.