„VG gera allt til að losna við Lilju“

Þór Saari, þingmaður Hreyfingarinnar, telur að Vinstri græn geri nú allt sem þau geti til að flæma Lilju Mósesdóttur burt úr þingflokknum og til þess sé beitt ýmsum brögðum.

„Árni Þór Sigurðsson gaf í skyn í Kastljósi í gær að engar breytingartillögur hefðu verið lagðar fram við fjárlagafrumvarpið, en það er ekki rétt. Lilja sagði sig meira að segja úr vinnuhóp stjórnarþingmanna um frumvarpið vegna þess að engar af hennar tillögum fengu hljómgrunn,“ segir Þór.

Hann segir að Lilja hafi reynt að ná fram breytingum á fjárlagafrumvarpinu frá því að það var lagt fram, en lítið hafi verið hlustað á hana.

„Það segir meira en margt annað um þetta fjárlagafrumvarp, að ekkert sé hlustað á Lilju Mósesdóttir, einn helsta sérfræðing okkar í efnahagsmálum. Hún ætti að vera efnahagsráðgjafi ríkisstjórnarinnar í ríkisfjármálum.“

Þór segir að málið snúist fyrst og fremst um „innherjapólitík.“ 

„Það er stríð innan þingflokks Vinstri grænna. Þau eru að reyna að losna við Lilju og  beita til þess öllum meðulum sem þau telja þurfa. Hún er sérfræðingurinn í þessum málum og hennar skoðanir og hugmyndir falla ekki að hugmyndum Alþjóðagjaldeyrissjóðsins, sem Steingrímur er að framfylgja. Þetta er ekkert flóknara en það, “ segir Þór.

• 7 blogg um fréttina

Bloggað um fréttina

• Jóhannes Ragnarsson: Rangt, Saari minn, rangt. VG vill ekki losna við Lilju.
• Magnús Helgi Björgvinsson: Bíddu er Þór Saari enn á ný með samsæriskenningar
• Reynir W Lord: Lilja í forystu VG, og burt með Steingrím
• Ólafur Ingi Hrólfsson: Hvað er Íslandsmetið í golfi?
• Heimir Lárusson Fjeldsted: Hvíld er góð Steingrímur J.
• Jón Ragnar Björnsson: Gæfa og gjörvuleiki
• Ómar Ragnarsson: Biðlað til Lilju?