Selfoss. www.mats.is

Hæstiréttur hefur staðfest úrskurð Héraðsdóms Suðurlands um að einn þriggja manna, sem handteknir voru nýlega grunaðir um vopnað rán og líkamsárás skuli afplána 196 daga eftirstöðvar dóma, sem hann átti eftir að afplána en maðurinn fékk reynslulausn 28. nóvember sl.

Maðurinn fór ásamt tveimur félögum sínum þann 11. desembeer inn í leiguíbúð í kjallara fjölbýlishúss á Selfossi en þar voru staddir fjórir piltar í tölvuleikjum. Eru þremenningarnir grunaðir um að hafa ógnað piltunum og barið þá og tekið tölvubúnað o.fl. og haft með sér á brott. 

Piltarnir fjórir sögðu að árásarmennirnir hafi ógnað þeim með hnífi og hafnaboltakylfu og hótað þeim lífláti ef þeir létu ekki munina af hendi eða tilkynntu lögreglu um málið.

Í úrskurði héraðsdóms segir, að maðurinn hafi kannast við að hafa farið inn í íbúðina í þeim tilgangi að sækja tölvur og annan búnað en neitað að hafa hótað neinum og þá kannast hann ekki við að þremenningarnir hafi verið með hnífa. 

„Hann hefur viðurkennt að hafa kannski tekið sér kylfu í hönd en muni ekki eftir því.  Fjórmenningunum hafi hins vegar mátt vera ljóst að hollast væri fyrir þá að láta af vilja þremenninganna enda hafi þeir verið „dópaðir“ og óárennilegir," segir í úrskurðinum. 

Hinir mennirnir tveir, sem tóku þátt í ráninu, voru einnig sendir í afplánun en þeir höfðu allir fengið reynslulausn.