Farþegaflugvélar á Reykjavíkurflugvelli í sumar. Ernir Eyjólfsson

Isavia, sem rekur íslenska flugvelli, segir að farþegaflug frá Reykjavíkurflugvelli til Noregs geti ekki staðist gildandi kröfur Evrópusambandsins. Hafi Flugfélag Íslands byrjað að selja farmiða í beinu flugi milli Reykjavíkurflugvallar og flugvalla í Noregi án þess að heimild fyrir slíku flugi lægi fyrir.

Fram kemur á vef Isavia, að félagið hafi bent Flugfélagi Íslands ítrekað á að ekki væri hægt að veita leyfi fyrir umræddu flugi af ofangreindum ástæðum og bent á þá möguleika að færa flugið til Keflavíkurflugvallar eða að millilenda á Egilsstöðum en báðir flugvellirnir uppfylla öryggiskröfur fyrir umrætt flug.

„Isavia telur yfirlýsingar Flugfélags Íslands á opinberum vettvangi um „óþarfa millilendingar“ og „ósveigjanleika“ekki á rökum reistar. Flugfélagi Íslands var fullkunnugt um að mjög ólíklegt væri að leyfi fengist til þess að hafa beint farþegaflug frá Reykjavíkurflugvelli til Noregs er það hóf farmiðasölu til viðskiptavina sinna," segir á vef Isavia. 

Fram hefur komið, að forsvarsmenn Flugfélags Íslands eru óánægðir með að vélar félagsins þurfi að millilenda á Egilsstaðaflugvelli á leið sinni frá Reykjavík til Noregs. Þurfa farþegar að ganga frá borði með farangur sinn og sæta vopnaleit. Ekki þarf að millilenda á leið frá Reykjavíkurflugvelli til Grænlands og Færeyja vegna undanþága.

Íslendingar fengu einnig undanþágu frá öryggisreglum á flugvöllum í innanlandsflugi sem byggist m.a. á fjarlægð Íslands frá meginlandi Evrópu. Slíkar undanþágur eru ekki í gildi í öðrum löndum. Farþegar sem fljúga innanlands hafa hingað til ekki þurft að fara í gegnum öryggisleit.

Vefur Isavia