Bólusetning gegn svínaflensu. CHRIS WATTIE

Nóg er til af bóluefni við svínaflensu í landinu. Um 150 þúsund Íslendingar hafa verið bólusettir gegn svínainflúensu, en sjúkdómurinn er að stinga sér niður á ný og var einn Íslendingur greindur með svínainflúensu fyrir skömmu. Hann var að koma frá Bretlandi.

Haraldur Briem sóttvarnarlæknir segir að um 150 þúsund Íslendingar hafi verið bólusettir gegn svínainflúensu og til séu álíka margir skammtar af bóluefni í landinu. Hann segir að þetta bóluefni hafi reynst vel og þeir sem hafa verið bólusettir þurfi ekki að láta bólusetja sig að nýju.

Haraldur sagði að heilsugæslan væri að búa sig undir að fleiri kæmu til að láta bólusetja sig. Auk bóluefni gegn svínaflensu er einnig verið að nota bóluefni gagnast gegn árstíðabundnu inflúensunni og svínainflúensunni.

Haraldur sagði að heilbrigðisyfirvöld hefðu hvatt fólk sem er eldra en 60 ára og fólk með undirliggjandi sjúkdóma til að fara í bólusetningu. Þeir sem eru utan þessara áhættuhópa stendur til boða að fá sama bóluefni gegn svínaflensu og var í boði í fyrravetur. En svínaflensan sé ólík hefðundinni flensu að því leyti að oft herji hún af enn meiri krafti á ungt fólk sem geti orðið mjög veikt.

 Þegar mest gekk á í fyrra voru um 200 manns mikið veikir og þar af þurfti að leggja 20 á gjörgæslu og álagið á heilbrigðiskerfið geysimikið. Segir Haraldur því brýnt að gera ekki of lítið úr svínaflensunni, hún geti verið varasöm.  

Haraldur sagði að svínaflensa hefði verið að greinast á suðurhveli jarðar í haust, aðallega á Nýja-Sjálandi og Ástralíu. Að undanförnu hefði hún verið að greinast í Evrópu, m.a. í Bretlandi. Sautján einstaklingar hefðu látist úr svínaflensu í Bretlandi að undanförnu.