Seðlabanki Íslands. mbl.is/Ernir

Bjarni Ólafsson bjarni@mbl.is

Þegar skoðaðar eru tölur Seðlabankans um erlenda stöðu þjóðarbúsins og beina fjárfestingu Íslendinga erlendis sést að þar er gert ráð fyrir því að Íslendingar eigi um 780 milljarða króna í erlendum hlutabréfum.

Við það bætast svo tæpir 300 milljarðar undir liðnum Lán til tengdra félaga, þannig að bein fjárfesting erlendis nemur í kringum 1.050 milljörðum króna. Seðlabankinn veitir ekki upplýsingar um það í hvaða fyrirtækjum hlutabréfaeignin er, en bein fjárfesting erlendis er þó flokkuð eftir geirum atvinnulífsins.

Kemur þar fram að eign Íslendinga í fyrirtækjum sem starfa í efnaiðnaði, gúmmí- og plastvöruframleiðslu nemi ríflega 380 milljörðum. Þá er eign í erlendri verslun um 160 milljarðar og 124 milljarðar í erlendri matvælaframleiðslu, að því er segir í fréttaskýringu í viðskiptablaði Morgunblaðsins í dag.

Ekki verður séð að svo háar fjárhæðir náist nema ef með í reikninginn eru tekin fyrirtæki, sem í raun eru í höndum erlendra kröfuhafa. Má í því dæmi nefna Actavis, Baug Group og Bakkavör. Í tilfelli Actavis er fyrirtækið í raun á valdi erlendra kröfuhafa með Deutsche Bank í fararbroddi. Í verslunarrekstri hlýtur verslunarveldi Baugs að vega þungt, en skuldir þess eru, eins og fram hefur komið, nær allar hjá erlendum bönkum eða gömlu bönkunum. Mikil óvissa ríkir um raunverulega eignastöðu þjóðarbúsins, en ætla má að hrein skuldastaða sé nær 1.000 milljörðum en 378 milljörðum í mati Seðlabankans.