Jóel Færseth Einarsson bíður þess að komast heim frá Indlandi. Ljósmynd/Helga Sveinsdóttir

Jóel Færseth Einarsson, sem fæddist á Indlandi nýlega, og Alþingi veitti ríkisborgararétt á laugardaginn var hefur ekki enn fengið íslenskt vegabréf. Ljóst er að hann mun verja fyrstu jólunum í Indlandi ásamt foreldrum sínum, þeim Einari Þór Færseth og Helgu Sveinsdóttur.

Foreldrar Jóels biðu spenntir eftir því að forseti Íslands staðfesti lögin um veitingu ríkisborgararéttar með undirskrift sinni. Í forsætisráðuneytinu fengust þær upplýsingar að forsetinn hafi skrifað undir lögin í gær. Þau voru síðan send til birtingar í Stjórnartíðindum. 

Í dómsmála- og mannréttindaráðuneytinu, þar sem Stjórnartíðindi eru til húsa, fengust þær fregnir að málið sé í hefðbundnu ferli líkt og fjöldi laga sem samþykkt og staðfest hafa verið. Staðfesting laganna um veitingu ríkisborgararéttar barst fyrir hádegi í dag. Líklegt var talið að lögin yrðu birt milli jóla og nýárs.

Einar Færseth, faðir Jóels litla, sagði að því miður væri útlit fyrir að þau þyrftu að dvelja í Indlandi yfir jólin. 

„Það er komið grænt ljós á allt en mér skilst að forsetinn verði að skrifa undir til að þetta verði allt löglegt,“ sagði Einar. „Við vorum að berjast fyrir því að komast heim því pabbi minn lést á meðan við vorum úti. Hann var jarðsettur í gær. Eftir niðurstöðu Alþingis með drenginn okkar síðastliðinn laugardag vorum við mjög vongóð um að komast heim í jarðarförina hjá föður mínum. Það var ekki svo gott.“