Óveður er víða um land. mbl.is/Rax

Veðurstofan í samvinnu við almannavarnadeild ríkislögreglustjóra fylgist nú vel með snjóalögum á Austurlandi. Búið er að lýsa yfir óvissuástandi vegna hugsanlegrar hættu á snjóflóðum. Talsverð úrkoma er og spáð er mikilli rigningu í nótt.

Talsverður snjór er í fjöllum á Austurlandi. Lofthiti hefur hækkað hratt í kvöld og farið er að rigna. Spáð er aukinni úrkomu í nótt. Víðir Reynisson, deildarstjóri almannavarnadeildar ríkislögreglustjóra, segir að við þessar aðstæður geti skapast snjóflóðahætta. Fylgst sé með stöðunni og tekin verði ákvörðun um framhald málsins í fyrramálið.

Einnig er fylgst vel með ám undir Eyjafjöllum. Ef úrkoma verður mikil er hætta á flóðum í ánum og jafnvel eðjuflóðum því mikil aska er enn í fjöllum á svæðinu eftir eldgosið í sumar.

Færð er víða erfið á landinu. Lögreglan á Akureyri vill koma því á framfæri að færð er farin að spillast í Víkurskarði og er það vart talið fólksbílafært lengur.  Ekki verður hugað að mokstri fyrr en á morgun, annan dag jóla.