Verð á flugeldum hjá björgunarsveitunum fyrir þessi áramót verður á svipuðu róli og verið hefur sl. tvö ár. Milli áranna 2007 og 2008 hækkaði verðið hins vegar mikið, vegna áhrifa af gengisfalli krónunnar og sömuleiðis hækkaði innkaupsverð frá verksmiðjum umtalsvert. Björgunarsveitirnar eru jafnan umsvifamestar í flugeldasölunni sem er þeim jafnframt mikilvæg fjáröflunarleið.

Fólk stendur með okkur

„Við rennum vitaskuld blint í sjóinn með hvernig salan verður. Hins vegar finnum við að fólk stendur með okkur sem aldrei fyrr og ímyndarmælingar Capacent eru félaginu hagfelldar og fólk sá mikilvægi starfs okkar í aðgerðum vegna eldgossins undir Eyjafjallajökli sem voru mjög umfangsmiklar. Þá vakti leiðangurinn til Haítí mikla athygli,“ segir Ólöf Snæhólm Baldursdóttir upplýsingafulltrúi Slysavarnafélagsins Landsbjargar, í samtali við Morgunblaðið.

Tugir flugeldasala

Veðurspár sýna að á gamlárskvöld verði milt veður með suðlægum áttum. Hláka verður um mest allt land en þarf þó ekki að fylgja úrkoma, segir Einar Sveinbjörnsson veðurfræðingur sem telur óljóst enn sem komið er hvernig flugeldaveðrið verði.

Lögreglustjórinn á höfuðborgarsvæðinu gaf um það bil sextíu aðilum leyfi til flugeldasölu fyrir síðustu áramót. Flest leyfanna voru gefin út til björgunarsveita, en einnig hafa karlaklúbbar, íþróttafélög og jafnvel einkaaðilar aflað fjár til starfsemi sinnar með flugeldum.

Hvað kosta flugeldarnir?  

• Trýtill er minnsta einingin í flugeldasölunni og kostar í ár 3.500 kr. Tralli er fjölskyldupakki sem kostar 6.900 og hækkar ekki í verði milli ára frekar en Trausti, vel útilátinn og vinsæll pakki.
• Trölli er ríflegasti flugeldaskammturinn og kostar 21.900 kr. Þá bjóðast nú sex skotkökur í kassa sem kostar 17.000 kr.