mbl.is/Ómar

„Við erum bjartsýn og þetta lítur vel út,“ segir Kristinn Ólafsson, framkvæmdastjóri Slysavarnafélagsins Landsbjargar, spurður út í flugeldasöluna. Hún hófst í gær og að sögn Kristins fer hún ávallt rólega af stað. Allt sé samkvæmt áætlun.

„Veðurspáin er okkur hliðholl og stemningin fín í samfélaginu gagnvart þessu, og gagnvart okkur,“ segir hann í samtali við mbl.is.

Hann bendir á að um helmingur sölunnar fari fram á gamlársdag. „Við viljum hvetja fólk til að vera tímanlega. Þá fær fólk bestu þjónustuna og mesta úrvalið. En það eru margir sem bíða með þetta alveg fram á síðustu stundu.“

Í mörgum tilfellum séu menn að halda í hefðina með því að kaupa sína flugelda á gamlársdag. „Það eru miklar hefðir í þessu. Menn finna jafnvel sinn sölumann,“ segir Kristinn.

Sprengjur af öllum stærðum og gerðum

Íslendingar munu sprengja um 500 tonn af flugeldum um þessi áramót og Landsbjörg á stóran hluta af þeim. Kristinn segir að það sé erfitt að átta sig á markaðshlutdeild björgunarsveitanna í ár, enda mikil samkeppni í flugeldasölu. Hann telur að það sé ekki ólíklegt að á bilinu 50-60% af seldum flugeldum séu keyptir hjá björgunarsveitunum.

Þá tekur hann fram að úrvalið í ár sé mjög gott. „Við erum með það allra stærsta,“ segir hann og bætir við að allar gerðir af skottertum séu í boði í ár. Spurður um verð segir Kristinn að það sé það sama og hafi verið í fyrra.

Björgunarsveitirnar eru með yfir 100 sölustaði um land allt er opið hjá þeim frá kl. 10 á morgnana til kl. 22 á kvöldin, nema á gamlársdag. Þá lokar kl. 16.