Sala á nýjum fólksbílum hefur aukist um 40% á árinu 2010. Þetta segir Özur Lárusson, framkvæmdastjóri Bílgreinasambandsins. Özur kveður þó þessa miklu prósentuaukningu ekki til marks um miklu betri sölu.

„Það verður að taka mið af því að á árinu þar á undan var nánast engin sala. Það þarf ekki marga bíla til þess að gera háa prósentu úr litlu magni. Ég hef ekki séð lokatölurnar því árstölurnar eru ekki komnar en þetta eru um þrjú þúsund bílar, nýskráðir fólksbílar þ.e.a.s. Þetta er allt sala nýrra fólksbíla. Það eru engir atvinnubílar inni í þessum tölum.“

Annað sem er stór þáttur í aukningunni er að bílaleigur fóru að endurnýja mikið sína bíla á þessu ári. Þá fóru margir bílar þangað,“ segir Özur en bílaleigubílar teljast til fólksbíla en ekki atvinnubíla því þeir eru skráðir sem nýir fólksbílar við sölu.

Í fréttaskýringu í Morgunblaðinu í dag treystir Özur sér ekki til að fullyrða um horfur á bílasölumarkaði á næsta ári þar sem ný lög um vörugjöld hafa þá tekið gildi. Lögin leggja auknar álögur á bíla sem losa mikinn koltvísýring en lækka álögur á þá sem losa minna.