Hegningarlagabrotum fækkaði um rúm 10% á höfuðborgarsvæðinu á árinu samanborið við árið 2009. Innbrotum fækkaði um fjórðung árið 2010 frá árinu á undan.

Samkvæmt bráðabirgðatölum frá lögreglunni á höfuðborgarsvæðinu voru að jafnaði framin 6 innbrot á dag árið 2010 samanborið við átta á dag árið áður. Að meðaltali voru framin tvö innbrot á dag í heimili á árinu 2010.

Nauðgunum fækkaði um þriðjung á milli ára á höfuðborgarsvæðinu og ofbeldisbrotum fækkaði um tæp 13 prósent. Tæpur helmingur allra ofbeldisbrota á sér stað í miðborg Reykjavíkur í kringum skemmtanahald um helgar. Minniháttar skemmdarverkum fækkaði lítilsháttar frá árinu á undan.

Umferðarlagabrotum fjölgaði lítillega milli ára, einkum hraðakstursbrotum. Einnig fjölgaði brotum þar sem ekið var undir áhrifum ávana- og fíkniefna um 15% en brotum vegna ölvunar við akstur fækkaði lítillega á sama tíma.

Fíkniefnabrotum fjölgaði um fimmtung milli ára. Lögreglan og tollgæslan á höfuðborgarsvæðinu lögðu hald á mun minna magn fíkniefna árið 2010 en árið á undan, en það ár var óvenju mikið magn fíkniefna haldlagt. Lagt var hald á helmingi minna magn af hassi og maríjúana en árið áður. Sjö kíló af amfetamíni voru haldlögð árið 2010 samanborið við hátt í sjötíu kíló í fyrra.

Bráðabirgðatölur lögreglu