Verð á bensíni og dísilolíu mun hækka strax á nýársnótt vegna hækkunar á bensínsköttum ríkisins. Hluti hækkunarinnar kemur fram þá en gjöldin koma síðan að fullu fram með innkaupum á nýjum förmum. Ef innkaupsverð breytist ekki á þessum tíma eða aðrar forsendur hækkar bensínlítrinn um 4,50 kr. og kostar 212 krónur í lok janúar eða í febrúar.

Samþykkt hefur verið að hækka vörugjöld og kolefnisgjald af bensíni og olíugjald og kolefnisgjald af dísilolíu um 3,60 kr. á lítrann sem svarar til 4,50 króna þegar virðisaukaskatti hefur verið bætt við.

Sérstakt vörugjald af bensíni og olíugjald af dísilolíu miðast við hvern seldan lítra og hækkar því strax um áramót. Algengt verð á bensíni hjá stóru olíufélögunum er nú 207,70 kr. Verðið fer í um 209,50 krónur um áramót og rúmar 212 kónur þegar kolefnisgjald og almennt vörugjald bætast við verðið við tollafgreiðslu á nýjum förmum.

Birgðastaðan getur verið mismunandi á milli fyrirtækja. Hjá N1 fengust þær upplýsingar að eins mánaðar birgðir væru til og því mætti búast við að áhrif gjaldabreytinga ríkisins yrðu að fullu komnar fram í lok janúar eða byrjun febrúar.

Þessar hækkanir þýða að kostnaður við rekstur á fjölskyldubíl í meðalnotkun hækkar um 9 til 10 þúsund krónur á ári, samkvæmt upplýsingum FÍB.

Sömu sögu er að segja af dísilolíu. Lítrinn fer væntanlega úr 208,70 kr. í rúmlega 211 um áramót og í rúmlega 213 krónur í janúar eða febrúar.

Bjartsýnn á verðþróun

Verð á bensíni er viðkvæmt fyrir breytingum á gengi og heimsmarkaði. Margt getur því breyst á þessum tíma. Breyttar forsendur geta vitaskuld leitt til þess að verðið hækki minna eða meira.

Bensínverð hefur oft hækkað eftir áramót vegna kulda á stærstu markaðssvæðunum vestanhafs og austan. Magnús Ásgeirsson, innkaupastjóri eldsneytis hjá N1, er bjartsýnn á þróun heimsmarkaðsverðs á næstunni. Hann telur að mestu hækkanirnar séu komnar fram, vegna veðurfarsins í Evrópu og Bandaríkjunum. „Ég held að janúarhrollurinn sé kominn,“ segir Magnús.

Þriðjungur víntegunda hækkar

Þrátt fyrir að áfengisgjald hækki um 1-4% um áramót og ætti að öðru jöfnu að leiða til 2% hækkunar útsöluverðs að meðaltali, breytist verð á áfengi lítið í upphafi. Tóbakið mun væntanlega hækka mun meira.

Áfengisgjald á léttu víni og bjór hækkar um 4%. Ef ekkert annað breytist hefur það þau áhrif að bjór sem kostar nú 300 krónur fer í 307 krónur og rauðvínsflaska sem kostar 1900 kr. fer í 1937 kr. Áfengisgjald á sterku áfengi hækkar minna, eða um 1%, kannski vegna þess hvað mikið hefur dregið úr sölu vegna hækkana áður. Það leiðir til þess að vodkaflaska sem nú kostar 4700 kr. fer í 4730 kr.

ÁTVR kaupir áfengið með áfengisgjöldum og gaf birgjum kost á að hækka verðið um áramót vegna hækkunar á áfengisgjöldum. Aðeins þriðjungur nýtti það. Birgjar taka hækkunina á sig eða hugsa sér að hækka síðar.

Tóbaksgjald hækkar um 7%. Við það hækkar heildsöluverð ÁTVR um 4,5 til 5%. Smásöluálagning er frjáls og verð því breytilegt. Búast má við því að sígarettupakki sem nú kostar 900 krónur fari yfir 940 krónur.