Flugeldar í Kópavogi á gamlárskvöld. mbl.is/Ómar Óskarsson

Styrkur svifryks er iðulega hár í Reykjavík fyrstu klukkustund nýs árs vegna flugeldaskota og oft nýársnóttina alla ef veður er stillt.  Umhverfis- og samgöngusvið Reykjavíkur segir þó líklegt, að styrkur svifryks muni lækka hratt á nýársnótt 2011 vegna austlægra vinda og einnig er spáð úrkomu síðar um nóttina.

Hægt er að fylgjast með styrk svifryks á vefmæli Reykjavíkurborgar sem er tengdur mælistöð á Grensásvegi. Farstöð borgarinnar verður að þessu sinni staðsett í Blesugróf.

Mikið magn af rusli hlýst af flugeldum. Umbúðirnar eru aðallega pappi sem fólk þarf að skila sjálft í endurvinnslustöðvar ásamt öðrum skotleifum. Flugelda má alls ekki setja í tunnur við heimili fólks.

Svifryk fór á árinu 29 sinnum yfir sólarhrings heilsuverndarmörk í Reykjavík árið 2010 en mátti samkvæmt reglugerð fara sjö sinnum yfir mörkin. Í níu skipti er ástæðan rakin til öskufjúks frá Eyjafjallasvæðinu og fór styrkurinn hæst í um það bil 400 míkrógrömm á rúmmetra en heilsuverndarmörkin á sólarhring eru 50. Þetta er hæsta svifryksgildið á 21. öldinni í Reykjavík.

Flugeldar geta valdið háum styrk svifryks. Búist er við töluverðri sölu á flugeldum en heildarinnflutningur fyrir landið um þessi áramót var 510.024 kg sem er meira en í 2009 en þá voru uppgefnar tölur um 425 tonn. Töluvert magn af flugeldum er þegar til í landinu frá liðnu ári. Þeir sem eru með viðkvæm öndunarfæri þurfa að gæta sín þegar mest er skotið og styrkurinn hár.

Köfnunarefnisdíoxíð (NO2) fór tvisvar sinnum yfir heilsuverndarmörkin á sólarhring árið 2010 en mörkin eru 75 míkrógrömm á rúmmetrar. Leyfilegt er að fara sjö sinnum yfir heilsuverndarmörkin samkvæmt reglugerð.

Brennisteinsvetni (H2S) fór tvisvar sinnum yfir heilsuverndarmörkin á sólarhring en mörkin eru 50 míkrógrömm á rúmmetra. Leyfilegt er að fara fjórum sinnum yfir þau á ári.