Skartgripabúðin þar sem sýningarglugginn til vinstri var brotinn.

Ljóst er af myndum úr eftirlitsmyndavélum í miðbæ Vestmannaeyja, að aðeins einn maður var að verki þegar rúða var brotin í skargripaverslun aðfaranótt gamlársdags og gripir hirtir úr sýningarglugga.

Lögreglan í Vestmannaeyjum hvetur þá sem einhverjar upplýsingar hafa um hver þarna var að verki, sama hversu smávægilegar þær kunni að vera, að hafa samband.

Fram kemur í dagbók lögreglunnar í Eyjum, sem birt er á vefnum eyjafréttum.is, að sömu nótt var farið í bílakjallara í Baldurshaga og skemmdar unnar á bíl þar inni. Var golfkylfa, sem geymd var í kjallaranum, notuð til að brjóta rúðu í bílnum og tvö ljós.  Ekki er vitað hver þarna var að verki og óskar lögreglan eftir upplýsingum um þann eða þá sem þarna áttu hlut að máli.

Aðfaranótt annars janúar sl. var lögreglu tilkynnt um skemmdir á gamla golfskálanum í Herjólfsdal. Þar voru fimm rúður brotnar auk þess sem rótað var í skápum og hurð spörkuð upp. Þá var sprautað úr fjórum vatnsslökkvitækjum. Þeir sem einhverjar upplýsingar hafa um þá sem þarna voru að verki eru beðnir um að hafa samband við lögreglu.

Fram kemur að lögreglan hafði í nógu að snúast um áramótin. Meðal annars tók par, sem var gestkomandi í bænum í nokkra daga, nokkurn tíma frá lögreglunni og var það til að mynda tvívegis vistað í fangageymslu vegna ölvunar og óspekta.