Jón Laxdal Arnalds.

Jón Laxdal Arnalds, fyrrverandi dómari og ráðuneytisstjóri, andaðist á heimili sínu s.l. sunnudag.

Hann var fæddur í Reykjavík 28. janúar 1935, sonur hjónanna, Guðrúnar Jónsdóttur Laxdal, kaupkonu í Reykjavík, og Sigurðar Arnalds, útgefanda og stórkaupmanns. Hann lætur eftir sig eiginkonu, Ellen Júlíusdóttur. Hann var áður kvæntur Sigríði Eyþórsdóttur og eru börn þeirra Eyþór og Bergljót.

Að loknu lögfræðiprófi frá Háskóla Íslands árið 1961 stundaði Jón framhaldsnám í hugverka- og auðkennarétti í London og kynnti sér einnig þetta sérsvið lögfræðinnar í Þýskalandi og Danmörku. Jón starfaði sem héraðsdómslögmaður fyrst eftir framhaldsnámið og varð síðar hæstaréttarlögmaður en réðst til starfa í stjórnarráðinu 1964, fyrst sem fulltrúi og deildarstjóri en gegndi síðan starfi ráðuneytisstjóra í sjávarútvegsráðuneytinu frá stofnun þess árið 1970 til 1985.

Jón átti sæti í fjölmörgum opinberum nefndum og stjórnum en einnig var hann fulltrúi Íslands í ýmsum alþjóðlegum nefndum um fiskveiðimál á þeim árum þegar Íslendingar færðu út landhelgina úr 12 mílum í 200 mílur og má sem dæmi nefna að hann var fulltrúi Íslands í íslensk-norskri fiskveiðinefnd um framkvæmd á stjórnun fiskveiða á Jan Mayen svæðinu 1980 til 1985 og form. sendinefndar Íslands á aðalfundum Norðaustur-Atlantshafsfiskveiðinefndarinnar 1972 til 1985 og forseti nefndarinnar í nokkur ár. Hann átti einnig sæti í sendinefnd Íslands á hafréttarráðstefnum SÞ 1974 til 1982.

Eftir að Jón lauk störfum í sjávarútvegsráðuneytinu varð hann borgardómari. Hann var einnig dósent, stundakennari og prófdómari við lagadeild Háskóla Íslands um langt skeið og eftir hann liggja ýmis fræðirit og greinar um einkaleyfarétt og helstu meginreglur vörumerkjaréttar. Hann átti og rak einkaleyfaskrifstofuna Faktor frá 1969-2006.

Jón sat um skeið í stjórn Verðbréfaþings Íslands hf. og Kauphallarinnar hf. Hann var alllengi forseti Guðspekifélags Íslands, svo og aðalræðismaður Indlands.