Héraðsdómur Reykjavíkur. mbl.is/Þorkell

Málflutningur fer fram í Héraðsdómi Reykjavíkur á næstunni þar sem bresk sveitarfélög, háskólar og stofnanir reyna að sækja rétt sinn gegn Landsbankanum og Glitni, en búið er að höfða um 230 slík mál gegn bönkunum.

Á morgun fer fram fyrirtaka í nokkrum málum gegn Glitni. Meðal þeirra sem höfða málin eru sveitarfélögin South Yorkshire og Somerset á Englandi og University of Cambridge. Um miðjan mánuði fer fram málflutningur í fimm málum sem höfðuð eru gegn Landsbankanum. Það eru fyrstu málin af þessu tagi sem verða flutt.

Ólafur Eiríksson hrl, sem sækir mál fyrir sum þessara félaga, segir að fjöldi sveitarfélaga, háskóla og stofnana hafi átt peninga inni á reikningum í Landsbanka og Glitni þegar bankarnir féllu haustið 2008. Þessi félög séu að láta reyna á rétt sinn.

„Við erum að skila inn greinargerðum og höldum því fram að þetta séu innistæður og neyðarlögin eigi að halda. Gagnaðilar okkar, sem eru erlendir bankar og vogunarsjóðir, halda því hins vegar fram að þetta séu annars vegar ekki innistæður og hins vegar að neyðarlögin séu ekki stjórnskipulega rétt sett og því beri að víkja þeim til hliðar,“ sagði Ólafur.

Ólafur sagði að bresk sveitarfélög og stofnanir hafi tapað gríðarlegum fjármunum á falli íslensku bankanna.