Lýsing í Hvalfjarðargöngum stenst staðla. Sverrir Vilhelmsson

Lýsing í innri hluta Hvalfjarðarganga fullnægir kröfum staðla þar að lútandi, samkvæmt niðurstöðum mælinga Mannvits verkfræðistofu hf. Lýsing verður aukin nokkuð innan beggja munna ganganna á árinu 2011 í samræmi við hertar kröfur frá árinu 2010, að sögn Spalar sem á og rekur göngin.

„Spölur fól Mannviti að mæla ljós frá lömpum í göngunum og endurkast ljóss frá akbrautum og veggjum í kjölfar EuroTap-skýrslu samtaka bifreiðaeigenda í Evrópu frá því sumarið 2010,“ segir í frétt Spalar.

Sem kunnugt er fengu Hvalfjarðargöngin ekki háa einkunn í skýrslu EuroTap og var m.a. fundið að lýsingunni.

Samkvæmt mælingum Mannvits er lýsing á innra svæði ganganna, sem er tæplega 5 km langt, 5-30% yfir lágmarkskröfum. Breyta þarf lýsingu á fyrstu 80 metrunum innan við gangamunna).

Auka þarf lýsingu á hluta svokallaðs aðlögunarsvæðis, sem tekur við af innkeyrslusvæði og nær um 430 metra inn fyrir gangamunna beggja vegna.

„Spölur hefur á liðnum árum aukið lýsingu í göngunum verulega en á grundvelli mælinga Mannvits var sett á framkvæmdaáætlun að auka lýsinguna enn frekar. Sú framkvæmd er á dagskrá strax á árinu 2011 og kostnaður áætlaður um 15 milljónir króna,“ segir í frétt Spalar.