Selfosskirkja er við Ölfusá. Kristinn Ingvarsson

Orkustofnun hefur veitt Selfossveitum bs. leyfi til rannsókna á vatnasviði Ölfusár við Selfoss og á afmörkuðum svæðum í landi. Hugmyndin er að reisa rennslisvirkjun í Ölfusá nálægt Selfossi. Rannsóknarleyfið gildir til 31. desember 2012.

Í umsókn Selfossveitna bs. kemur fram að byggðasamlagið hafi  skoðað möguleika á að reisa vatnsaflsvirkjun í Ölfusá við Selfoss. „Gert er ráð fyrir að virkjunin verði rennslisvirkjun og því stærð uppistöðulóns í lágmarki,“ segir m.a. í umsókninni. Gert er ráð fyrir því í umsókninni að gagnasöfnun ljúki í ágúst á þessu ári.

„Leiði framangreindar rannsóknir til þess að leyfishafi hafi hug á virkjun á rannsóknarsvæðinu er unnt að gefa út viðbótarleyfi varðandi rannsóknir er varða staðsetningu og fyrirkomulag mannvirkja og geta haft rask í för með sér,“ segir í frétt Orkustofnunar.

Þar kemur einnig fram að rannsóknarleyfið feli ekki í sér heimild til nýtingar á vatnasviði rannsóknarsvæðisins. Sækja þarf um virkjanaleyfi sérstaklega og semja um vatnsréttindi.