Björgólfur Thor Björgólfsson. mbl.is/Ásdís

Siðanefnd Blaðamannafélags Íslands hefur komist að þeirri niðurstöðu, að fréttastofa Ríkisútvarpsins hafi ekki brotið siðareglur blaðamanna í umfjöllun um ásakanir á hendur fyrrverandi stjórnendum Landsbankans um  markaðsmisnotkun þeirra.

Um var að ræða pistil, sem Sigrún Davíðsdóttir flutti og byggði á skýrslu rannsóknarnefndar Alþingis og lánayfirliti Kaupþings frá september 2008. Kom þar fram, að stjórnendur landsbankans hafi ekki gert grein fyrir því með skýrum hætti, gagnvart verðbréfamarkaði, að svokölluð aflandsfélög, sem skráð voru hluthafar í bankanum og versluðu með hlutabréf í honum, hafi raunverulega verið í eigu bankans eða tengdra aðila.

Eitt þessara félaga, Empennage, var í pistlinum tengt nafni Björgólfs Thors Björgólfssonar með þeim orðum að það væri „samslungið Samson eignarhaldsfélagi í eigu feðganna Björgólfs Guðmundssonar og Björgólfs Thors. 

Björgólfur Thor kærði umfjöllunina til siðanefndar blaðamanna og taldi að Sigrún hefði dregið rangar ályktanir af umfjöllun í rannsóknarskýrslunni.  Sigrún gekk þá eftir því hjá höfundum rannsóknarskýrslunnar hver réttur skilningur á umfjölluninni væri og fékk þá staðfest, að umfjöllunin ætti við um hluthafafund í Landsbankanum en ekki í Empennage. 

Í kjölfarið birtist athugasemd á vef RÚV samþykktum Landsbankans hefði verið breytt, ekki Empennage. 

„Megininntak pistilsins er um hvernig átta svokölluð „aflandsfélög" Landsbankans voru notuð til meintrar markaðsmisnotkunar og að kerfið sem Landsbankinn notað hafi bæði verið flókið og ógagnsætt. Siðanefnd telur greindar heimildir fullnægjandi til umfjöllunar um málefnið og þar með um kæranda. Hann verður að una því að um hann sé fjallað i þessu samhengi. Siðanefnd telur að hinn kærði fréttamaður hafi vandað upplýsingaöflun sína, úrvinnslu og framsetningu, þrátt fyrir að í ljós hafi komið að hann hafi ranglega talið að í skýrslu rannsóknarnefndarinnar hafi verið fjallað um hækkun hlutafjár í Empennage þegar átt var við hækkun hlutafjár í Landsbankanum. Þetta atriði, sem reyndar var leiðrétt í vefútgáfu, getur eitt og sér ekki talist vera brot á siðareglum, enda ekki aðalatriði pistilsins. Þá er ennfremur vísað til þess að kærandi er ekki nefndur í þvi samhengi heldur Björgólfur Guðmundsson og Samson," segir í niðurstöðu siðanefndar.