Blindbylur hefur verið á norðanverðu landinu. Þessi mynd var tekin á Akureyri í gærkvöldi. mbl.is/Þorgeir

Mikið óveður geisar nú um landið og hafa björgunarsveitir og lögreglumenn víða um land þurft að sinna útköllum vegna þess. 

Að sögn lögreglunnar í Reykjavík voru engin óveðurstengd útköll í nótt en hinsvegar byrjaði síminn að hringja rétt fyrir kl. 6 í morgun og þegar rætt var við lögregluna um 6:30 höfðu sex foktilkynningar borist.

Björgunarsveit var kölluð út á Grundarfirði vegna báts sem var að losna frá bryggju, björgunarsveitin í Búðardal aðstoðaði ökumann sem fest hafði bíl sinn í Bröttubrekku, á Selfossi og í Hveragerði voru sveitir kallaðar út vegna foks. Í Reykjavík voru björgunarsveitamenn kallaðir í viðbragðsstöðu í hús. 

Lögreglan á Suðurnesjum var send í tvö útköll í nótt, annars vegar þegar þakkantur losnaði og hins vegar þegar sjónvarpsgreiða byrjaði að fjúka til.

Þá var björgunarsveit Árborgar og Hveragerðis á ferðinni í nótt en þakplötur höfðu losnað af nokkrum húsum. Að sögn lögreglunnar á Selfossi fékk hún um 6-7 óveðurstengd útköll í nótt.

Hjá lögreglunni á Akureyri fengust þær upplýsingar að þar hefði gengið á með ofankomu og blindbyl í nótt. Mörg verkefni hefðu fallið til sem flest tengdust því að fólk væri í vandræðum með bílana sína. „Bærinn er nánast ófær nema fyrir jeppa en það er farið að rofa til,“ sagði varðstjórinn.

Rafmagn fór af stærstum hluta Þingeyjarsýslna upp úr klukkan 10 í gærkvöldi. Háspennulína á milli Akureyrar og Laxárvirkjunar slitnaði og í kjölfarið slógu vélar Laxárvirkjunar út.

Mikill krapi er í Laxá sem veldur erfiðleikum við að halda vélum virkjunarinnar í eðlilegum rekstri.

Unnið var að því undir miðnættið að koma vélunum í gang að nýju til þess að koma á rafmagni á Norðausturlandi.