Vigdís Hauksdóttir. Mbl.is

Vigdís Hauksdóttir, þingmaður Framsóknarflokksins, hefur óskað eftir fundi í allsherjarnefnd. Segist hún gera það í kjölfar frétta Ríkissjónvarpsins í gær  þar sem innanríkisráðherra hafi sett ofan í við allsherjarnefnd vegna veitingar ríkisborgararéttar barns sem statt er í Indlandi. Indversk staðgöngumóðir fæddi barnið fyrir íslenska foreldra.

Vigdís óskar eftir að fulltrúar innanríkisráðuneytisins sem hafa með ríkisborgaramál að gera og fulltrúar utanríkisráðuneytisins sem hafa með útgáfu vegabréfa að gera verði kallaðir fyrir nefndina.

Vigdís segir, að í aðdraganda þess máls fyrir þinglok í desember hafi  fulltrúar dómsmálaráðuneytisins varað allsherjarnefnd við að leggja það til við Alþingi að veita barninu ríkisborgararétt á grundvelli samkomulags sem unnið er að í samvinnu við Evrópusambandsríkin um málefni sem snúi að staðgöngumæðrun á Indlandi. Hafi fulltrúar ráðuneytisins bent á, að með því að veita indversku barni, sem ætti indverska foreldra að lögum, íslenskan ríkisborgararétt myndi slíkt flækja málin enn frekar en orðið var.

Á endanum lögðu allir nefndarmenn, nema Vigdís, fram frumvarp um að 43 einstaklingum yrði veittur ríkisborgararéttur, þar á meðal litla drengnum. Vigdís tók síðan ekki þátt í atkvæðagreiðslu um málið á þingfundi.

Íslensku hjónin eru enn með drenginn á Indlandi þar sem ekki hefur verið gefið út vegabréf fyrir hann. Sjónvarpið sagði, að íslensk stjórnvöld geri kröfu um DNA-próf sem sýni að íslenski maðurinn sé faðir drengsins og einnig að indversk stjórnvöld staðfesti að íslensku hjónin fari með forræði drengsins. Takist þetta ekki gætu hjónin þurft að höfða  véfengingarmál fyrir dómstólum á Indlandi.