Jacob Vestergaard.

Jacob Vestergaard, sjávarútvegsráðherra Færeyja, segir að ákvörðun um makrílkvóta Færeyinga á þessu ári verði tekin í þessum mánuði. Hann segir afar óeðlilegt af ESB að tengja ágreining um makrílveiðar við aðrar viðræður um fiskveiðimál.

Vestergaard segir að Færeyingar hafi ekki tekið ákvörðun um makrílkvóta fyrir þetta ár, en hann reiknar með að ákvörðun um kvótann verði tekin í þessum mánuði.

„Við höfum verið í viðræðum við ESB og Noreg um veiðar úr makríl, en þeim viðræðum hefur verið slitið. Við eigum einnig í viðræðum um fiskveiðimál við Noreg og sömuleiðis við ESB og í desember var ákveðið að vegna ágreinings um makrílveiðar að gera hlé á þeim. Í síðustu viku fengum boð frá Norðmönnum um að koma á ný viðræðna um fiskveiðimál. Þess vegna höfuð við  farið varlega í yfirlýsingar því við viljum ekki auka á ágreininginn milli landanna. En við leggjum áherslu á að ágreiningur um makrílveiðar eigi ekki að hafa áhrif á viðræður um önnur mál á sviði sjávarútvegs.“

ESB hefur hótað því að leggja löndunarbann á íslensk og færeysk skip sem veiða makríl. Vestergaard sagði að Norðmenn hefðu sett löndunarbann á færeysk makrílveiðiskip í fyrra og nú stæðu þeir frammi fyrir samskonar hótun frá ESB. Hann sagði að löndun úr einu færeysku skipi hefði verið stöðvuð í Skotlandi í fyrra. Skosk stjórnvöld væru mjög ósveigjanleg í þessu máli og því hefðu færeysk skip ekki reynt að landa makríl í Skotlandi eftir þetta atvik. 

Vestergaard sagði að ESB hefði ekki tilkynnt með formlegum hætti að færeyskum skipum væri óheimilt að landa makríl í höfnum ESB-landa. Eina sem lægi fyrir væri að ESB vildi ekki gera fiskveiðisamninga við Færeyinga vegna ágreiningsins um makrílveiðarnar. Hann sagði afar óeðlilegt að blanda þessum tveimur málum saman. Menn ættu að geta gert fiskveiðisamninga þó að ágreiningur væri um makrílveiðar.