Kristinn Örn Jóhannesson, formaður VR, á fundinum í kvöld. Árni Sæberg

Framhaldsaðalfundur VR samþykkti í kvöld lagabreytingu Rannveigar Sigurðardóttur um kosningu formanns, stjórna og trúnaðarráðs VR. Tillagan var samþykkt með miklum meirihluta, en í henni segir að verið sé að opna fyrir lýðræði sem hafi verið kallað eftir.

Áður fyrr gátu eingöngu meðlimir trúnaðarráðs kosið stjórnarmenn. Héðan í frá verður öllum félagsmönnum veittur kosningaréttur í stjórnarmannakosningu.

Samþykkt tillögunnar gerði það að verkum að allar lagabreytingar stjórnarinnar voru teknar af dagskrá. Af þessum sökum þurfti ekki að taka fyrir tillögu stjórnar VR um breytingu á 3. grein laga félagsins um að kjörgengi félagsmanna, sem hætta störfum á vinnumarkaði vegna örorku yrði fellt niður, en þeim þó gert kleift að vera áfram félagsmenn gegn greiðslu félagsgjalds.

Geðhjálp sendi frá sér yfirlýsingu vegna þessarar tillögu stjórnar VR og lýsti hneykslan sinni á henni. „Þetta er gróf mismunun gagnvart fötluðum og sjúkum félagsmönnum verkalýðsfélagsins og verður ekki liðin,“ sagði í yfirlýsingunni. Geðhjálp hvatti einnig alla réttsýna félagsmenn VR til að fjölmenna á fundinn og koma í veg fyrir að öryrkjum yrði sýnt slíkt virðingarleysi og óréttlæti.

Hart var tekist á um fjórar tillögur stjórnar að lagabreytingum, mikið var um frammíköll og hróp úr sal auk þess sem allmargir stigu í pontu til að lýsa skoðun sinni.   Eftir að tillaga Rannveigar var samþykkt færðist nokkur ró yfir.