Gylfi Arnbjörnsson, forseti ASÍ og Vilmundur Jósefsson, formaður SA, ræðast við í upphafi fundar. mbl.is/Kristinn

Samninganefnd Alþýðusambandsins og Samtaka atvinnulífsins hittust hjá ríkissáttasemjara eftir hádegið í dag. Skiptar skoðanir eru innan ASÍ um hvort grundvöllur sé fyrir því að stefna að samræmdri launastefnu.

Samninganefnd ASÍ hefur fundað innbyrðis undanfarna daga þar sem m.a. hefur verið kannaður grundvöllur fyrir því að fara fram með samræmda launastefnu á hendur atvinnurekendum. Á fundinum í dag má vænta þess að byrjað verði að ræða forsendur launastefnunnar og lengd væntanlegs kjarasamnings en verkalýðshreyfingin hefur verið treg til viðræðna um þriggja ára samning sem er vilji SA.

Í frétt frá ASÍ segir að sambandið hafi farið fram á fund með ríkisstjórninni til að ræða hennar aðkomu að viðræðunum en af hálfu ASÍ er lögð áhersla á að tiltekin atriði er varða ríkisstjórnina verði að vera á hreinu svo að samningar náist.

Í gær hittist samninganefnd Starfsgreinasambands Íslands í húsakynnum ríkissáttasemjara. Þar var aðallega rætt um samræmda launastefna. Að mati Vilhjálms Birgissonar, formanns Verkalýðsfélags Akraness, kemur  samræmd launastefna ekki til greina. Krafa Starfsgreinasambandsins sé að lágmarkslaun verði 200 þúsund á mánuði og að að útflutningsgreinar eins og til dæmis fiskvinnslan komi myndarlega til móts við sína starfsmenn á grundvelli þess að slík fyrirtæki hafa verið að hagnast umtalsvert vegna gengisfalls krónunnar.