Lögreglan leitar nú að vitnum að árekstri í Hafnarfirði sem átti sér stað á laugardag. Fjórir harkalegir árekstrar urðu um helgina á Höfuðborgarsvæðinu. Lögregla hvetur ökumenn til að sýna aðgát.

Tvær bifreiðar lentu saman á gatnamótum Reykjavíkurvegar og Hjalalbrautar í Hafnarfirði sl. laugardag. Við áreksturinn kastaðist önnur bifreiðin á þá þriðju sem var kyrrstæð við gatnamótin á rauðu ljósi. Málið er í rannsókn. Grunur leikur á um að annar ökumannanna hafi ekið á móti rauðu ljósi. Lögreglan leitar nú vitna vegna málsins.

Tvennt var flutt á sjúkrahús í kjölfar slyssins. Vitni að atvikinu eru beðin um að hafa samband við lögreglu í síma 444-1000. Meðfylgjandi mynd er tekin af vettvangi.

Um klukkan fjögur sama dag varð fjögurra bíla árekstur á Reykjanesbraut við Bústaðaveg. Þrjú ökutækjanna voru kyrrstæð í röð við gatnamótin á rauðu ljósi. Því fjórða var ekið aftan á röðina með keðjuverkandi áhrifum.

Ökumaður sá er valdur var að árekstrinum bar því við að hafa blindast af sólinni sem var lágt á lofti þegar þetta gerðist. Þrír voru fluttir á slysadeild með minniháttar áverka. Af þessu tilefni hvetur lögregla ökumenn til að sýna fyllstu aðgát þegar sól er lágt á lofti eins og raunin var í þessu tilviki. 

Á laugardagskvöld varð árekstur á gatnamótum Reykjavíkurvegur og Flatahrauns í Hafnarfirði. Bifreið ók til suðurs á Reykjavíkurveg og beygði til vinstri í veg fyrir bifreið sem kom úr gagnstæðri átt. Einn var fluttur á slysadeild í kjölfarið en er ekki talinn alvarlega slasaður.

Að sögn lögreglu er þetta óhapp lýsandi fyrir þá hættu sem skapast þegar aksturslínur eru skornar í vinstri beygju eins og gert er á þessum gatnamótum. Lögreglan hvetur því ökumenn til að sýna sérstaka aðgát í slíkum tilvikum. Unnið er að því að minnka áhættu sem af þessu stafar meðal annars með uppsetningu sérstakra beygjuljósa á fjölförnum ljósastýrðum gatnamótum, gerð hringtorga og miðlægra gatnamóta.

Á sunnudagskvöld varð bílvelta á Sæbraut við Sólfarið. Tvær bifreiðar er báðar voru á leið vestur Sæbraut lentu saman með þeim afleiðingum að önnur þeirra valt tvær veltur. Ökumaður þeirrar bifreiðar var fluttur á slysadeild eftir óhappið. Atvikið er í rannsókn.