Golli / Kjartan Þorbjörnsson

Ekki liggur skýrt fyrir hver sér um viðgerð á fráveitulögnum á Álftanesi eftir að Orkuveita Reykjavíkur rifti samningi um fráveitu Álftaness. Bæjarstjórinn á Álftanesi segist ekki taka mark á riftuninni. Hugsanlegt er að OR þurfi að höfða staðfestingarmál til að riftunin öðlist gildi.

Orkuveitan sendi í gær frá sér tilkynningu þar sem fram kom, að stjórn félagsins hefði ákveðið að rifta samningnum vegna vanefnda sveitarfélagsins á greiðslum til Orkuveitunnar samkvæmt samningnum. Nemi krafan tæpum 90 milljónum króna. 

Pálmi Þór Másson, bæjarstjóri Álftaness, sagði við mbl.is, að Álftanesbær hafi áður en yfirlýsing um riftun barst sveitarfélaginu, sent Orkuveitu Reykjavíkur yfirlýsingu um skuldajöfnun vegna fráveitugjalda og fráveituframkvæmda, sem hafi tafist af ýmsum ástæðum. Nemi sú krafa tæpum 72 milljónum króna.

Pálmi Þór sagði að sveitarfélagið telji ekki að forsendur séu fyrir hendi svo Orkuveitan geti rift samningnum vegna vanefnda og fallist því ekki á riftunina. Orkuveitan verði væntanlega að fara í staðfestingarmál vilji hún halda málinu til streitu.

Til skoðunar er núna hjá Orkuveitunni að höfða slíkt mál. Það eiga sér hins vegar enn stað viðræður milli stjórnenda OR og stjórnenda Álftaness um þann ágreining sem hefur verið um málefni fráveitu Álftaness.