Pétur Kristján Guðmundsson slasaðist í Innsbruck á nýársnótt.

Pétur Kristján Guðmundsson, sem slasaðist alvarlega í slysi í Austurríki á gamlárskvöld, kemur heim til Íslands á morgun. Hann verður fluttur heim með flugvél Landhelgisgæslunnar.

Guðmundur Geir Sigurðsson, faðir Péturs, segist afar ánægður með að búið sé að tryggja heimferð sonar síns. Guðmundur fór til Austurríkis og  heimsótti Pétur á sjúkrahúsið í vikunni. Hann var á leiðinni heim aftur þegar hann fékk fréttir af því að Landhelgisgæslan myndi ná í Pétur.

Pétur, sem er 24 ára gamall, slasaðist alvarlega þegar hann féll fram af hárri hengju við borgina Innsbruck í Austurríki um áramótin. Hann hlaut mænuskaða og er lamaður fyrir neðan mitti.

Guðmundur sagði að Pétur yrði fluttur á Landspítalann og færi fyrst í eingangrun, en það er ráðstöfun sem er alltaf gripið til til þess að koma í veg fyrir að smit berist með sjúklingum. Síðan færi hann í endurhæfingu á Grensásdeild.

Guðmundur sagði að Pétur hefði verið látinn standa á fætur í sérstöku stuðningstæki í dag. Heilsa hans væri því að batna. „Það er of mikið að segja að hann hafi mátt í fótunum, en hann hefur einhverja tilfinningu í þeim og það gefur manni von um að sú tilfinning geti orðið að mætti seinna. Þegar komið er við fæturna þá finnur hann fyrir snertingu. Mænan fór ekki alveg í sundur. Maður reiknar með að hann þurfi að nota hjólastól, en maður heldur í þá von að endurhæfing skili árangri,“ segir Guðmundur.

Flugvél Landhelgisgæslunnar lendir í fyrramálið. Með í för er læknir og sjúkraflutningamaður.