Stjórnmálafundur VG á Hótel KEA á Akureyri í kvöld. Skapti Hallgrímsson

Vinstrihreyfingin-grænt framboð hélt fundarherferð sinni um landið áfram í kvöld og var Akureyri viðkomustaðurinn. Þar byrjaði kvöldið á félagsfundi en að honum loknum hófst almennur stjórnmálafundur á Hótel KEA.

„Þetta var mjög málefnalegur og góður fundur. Það var náttúrulega verið að spyrja út í stöðuna í þingflokknum og við fengum mjög góð svör," sagði Andrea Hjálmsdóttir bæjarfulltrúi Vinstri grænna á Akureyri að loknum félagsfundinum sem var aðeins fyrir félagsmenn. Steingrímur J. Sigfússon og Lilja Rafney Magnúsdóttir sátu þann fund sem 27 manns mættu á.

„Þingflokksdeilan eða ágreiningurinn hefur ekki endurspeglast í
flokksstarfinu hér fyrir norðan en maður veit aldrei hvernig hlutirnir þróast og ég bjóst við að sjá fólk skiptast meira í fylkingar á þessum fundi en það var ekki. Það var frekar verið að spyrja og leita skýringa því fyrir venjulegan flokksmann er oft erfitt að átta sig á fjölmiðlaumfjölluninni og hvað er raunverulega að gerast. Fólk var að einblína á hvert við ætluðum að halda, leggja áherslu á að við gleymum ekki því sem sameinar okkur og að við ættum að ýta undir það sem vel er gert," sagði Andrea og bætti við að mikil ánægja væri með að forystusveit flokksins hefði lagt upp í þessa fundarherferð um landið núna. „Það er gott fyrir okkur sem eru mis langt frá að fá góðar skýringar frá fyrstu hendi um hvað er í gangi og að við getum tjáð okkur."

Um fjörtíu manns mættu á almenna stjórnmálafundinn þar sem Steingrímur, Lilja Rafney og Þuríður Backman héldu tölu og sátu fyrir svörum. Þar voru ríkisfjármálin mikið rædd, spurt út í breytingar á skattakerfinu, út í atvinnumálin og Steingrímur var spurður hvort hann teldi stjórnin geta kallað sig velferðarstjórn sem hann taldi. Ágreining í þingflokknum bar ekki á góma.

Nánar verður fjallað um fundina í Morgunblaðinu á morgun.