Fari sem horfir verða 448 börn í Reykjavík án leikskólapláss í haust. Þá vantar pláss hjá dagforeldrum fyrir um það bil sama fjölda barna en áttatíu dagforeldra þarf til viðbótar í borginni til að mæta þessu. Þetta segir Þorbjörg Helga Vigfúsdóttir, fulltrúi Sjálfstæðisflokks í menntaráði.

Kveður hún algerlega óljóst hvernig málið verður leyst. Hún telur að erfitt verði að fjölga dagforeldrum eins mikið og þarf fyrir haustið en starfshópur sem ætlað er að athuga endurskipulagningu rekstrar leikskóla meðal annars hefur tekið til starfa.

„Það er unnið á fullu að því að sjá til þess að næsta haust verði leikskólapláss fyrir þau börn sem þurfa að komast að,“ segir Óttarr Ólafur Proppé, annar tveggja fulltrúa Besta flokksins í menntaráði. Að auki segir Óttarr að vinna við að leita leiða til að fjölga dagforeldrum í borginni sé að hefjast.

Ekki liggi fyrir hvernig það verði gert en meðal þess sem komið hefur til tals er að leyfa dagforeldrum að hafa fleiri börn skráð í vist en nú er heimilt.