Heiðarhorn sést fyrir miðri mynd, undir skýinu. Næst sést Skessuhorn. Myndin var tekin kl. 16.00 í gær. Sem sjá má er snjór og hálka á fjallinu. Ljósmynd/Arngrímur Hermannsson

Að minnsta kosti 80 björgunarsveitarmenn taka þátt í björgun fótbrotins fjallgöngumanns af Heiðarhorni á Skarðsheiði. Björgunarsveitir frá Akranesi, Borgarnesi og höfuðborgarsvæðinu taka þátt í aðgerðinni, sem stýrt er frá miðstöð Björgunarfélags Akraness.

„Þetta er erfið aðgerð, mjög erfið,“ sagði Lárus Guðlaugsson, stjórnandi aðgerðarinnar. „Þetta er burður alla leið og brostið á myrkur. Svo er svartaþoka og ekki flugfært.“

Lárus sagði að mikil hálka sé á fjallinu, sem er 1.060 m hátt og mjög bratt á köflum. Útkallið kom um klukkan 15.30. Þeir sem óskuðu eftir aðstoð gátu látið vita um nákvæma staðsetningu þess fótbrotna. Það mun vera nær efst í Heiðarhorninu.

Fyrstu björgunarmennirnir voru að nálgast það að vera hálfnaðir upp á Heiðarhorni laust fyrir klukkan fimm í dag. Þeir höfðu reiknað með að vera um það bil tvær klukkustundir upp á hornið. Ganga þarf hluta leiðarinnar á mannbroddum sem tefur fyrir. 

Lárus sagði að reikna megi með því að ferðin niður með hinn slasaða geti orðið tvöfalt eða þrefalt lengri. Það gæti því dregist fram undir miðnætti að aðgerðinni ljúki. 

„Reglan í þessu er að flýta sér hægt,“ sagði Lárus. „Það þarf að koma öllum heilum upp og aftur til baka.“

Uppfært kl. 17.54 

Samkvæmt upplýsingum mbl.is var sá sem fótbrotnaði að ganga á fjallið ásamt hópi og í honum er m.a. læknir. 

Um klukkan 17.40 var um 350 metra hæðarmunur á milli fyrstu björgunarmanna og þess fótbrotna og þeirra sem með honum eru. Vegalengdin á milli hópanna er þó talsvert meiri. 

Á Heiðarhorni í blíðskaparveðri. Nú er þar svartaþoka og myrkur auk þess sem ísing og hálka er þar uppi.