Helgi Snær Sigurðsson helgisnaer@mbl.is

„Vatnið er að sjatna og Brisbane er að þorna,“ segir Erla Sigurlaug Sigurðardóttir sem flutt er með eiginmanni sínum Víglundi Helgasyni og tveimur börnum til Brisbane í Ástralíu en þau komu til borgarinnar í fyrradag. Gríðarleg flóð urðu í borginni í liðinni viku og þurftu þúsundir að flýja heimili sín. Eyðileggingin sem blasir við er rosaleg, að sögn Erlu.

„Hreinsanir eru hafnar á fullu, það eru bílar hérna að taka sandpokana og alls staðar fólk í gúmmístígvélum með skóflur og kústa, drullugt upp fyrir haus, að moka, hreinsa og þrífa,“ segir Erla.

„Við fórum í miðbæinn í gær. Það hefur lækkað í ánni og ekkert flóð þar lengur en allt við ána, þar sem eru ofsalega fallegir göngustígar og slíkt, er bara girt af. Ferjan náttúrlega gengur ekki, áin er sjúklega straumhörð og það siglir enginn á henni nema lögreglan enda allar ferjustöðvarnar brotnar, engar ferjur sem ganga. Ferjurnar eru mikilvæg samgöngutæki hérna.“

Erla segir fjölskylduna ekki hafa verið komna með húsnæði í borginni áður en hún lagði af stað en hafi verið að skoða íbúð á háskólasvæðinu og þar sé allt á floti. Erla hlaut alþjóðlegan Rotary-námstyrk til að fara í meistaranám í friðar- og átakafræðum í Brisbane og býr nú ásamt fjölskyldu sinni hjá Rotary-fólki, í húsi sem slapp við flóðið þar sem það stendur frekar hátt í borginni. „Við bíðum bara róleg hérna, við ætlum að búa í háskólahverfinu, þegar það lagast. Við gistum bara hjá Rotary-fólkinu þangað til. Við ætluðum að reyna að flytja í þessari viku en það mun eitthvað dragast. Við ætlum að fara á stúfana í dag, fara að skoða hvernig ástandið er,“ segir Erla og er bjartsýn þrátt fyrir ástandið.