Herjólfur mun ekki sigla í Landeyjahöfn fyrr en áreiðanlegar dýptarmælingar liggja fyrir. Dýptin var mæld bæði á föstudag og laugardag, en aðstæður voru erfiðar og niðurstöður því ónákvæmar. Herjólfur mun því sigla tvisvar á dag milli Vestmannaeyja og Þorlákshafnar næstu daga.

Þetta kemur fram í fréttatilkynningu frá Eimskipafélagi Íslands.

Lóðsinn frá Vestmannaeyjum framkvæmdi mælingar á föstudag, en samkvæmt þeim hafði dýpki minnkað minna en eftir óveður fyrr í vetur. Skip Siglingastofnunar mældi dýpi daginn eftir, en sú mæling leiddi í ljós að grynnkað hefði utan við hafnarmynnið vestanvert.

Ölduhæðin næstu daga verður mikil, og segir í tilkynningu að það myndi hamla siglingum í Landeyjahöfn þótt dýpi væri nægt. Þá er ítrekað að skipstjórar Herjólfs beri ábyrgð á öryggi farþega. Mikilvægt sé að þeir fái frið til að sinna vinnu sinni og að ekki sé þrýst á þá að sigla við mjög erfiðar aðstæður.