Alls voru 12 ökumenn stöðvaðir á höfuðborgarsvæðinu um helgina, grunaðir um að vera undir áhrifum áfengis eða fíkniefna.

Fjórir voru teknir í Reykjavík fyrir að aka undir áhrifum fíkniefna. Þrír þeirra voru stöðvaðir í miðborginni og einn í Árbæ. Þrír þessara ökumanna voru stöðvaðir á laugardag og einn á sunnudag. Þetta voru þrír karlmenn á aldrinum 19-27 ára og ein kona um tvítugt.

Átta ökumenn voru teknir fyrir ölvunarakstur á höfuðborgarsvæðinu um helgina en sjö þeirra voru stöðvaðir í Reykjavík og einn í Kópavogi. Sex voru teknir á laugardag og tveir á sunnudag en þetta voru allt karlmenn á aldrinum 20-38 ára. Tveir þeirra höfðu þegar verið sviptir ökuleyfi.

Samkvæmt upplýsingum frá lögreglunni á höfuðborgarsvæðinu hafa tæplega þrjú hundruð ökumenn verið stöðvaðir á höfuðborgarsvæðinu síðustu daga í sérstöku umferðareftirliti sem lögreglan heldur nú úti í umdæminu.

Þrír ökumenn reyndust ölvaðir og/eða undir áhrifum fíkniefna við stýrið og eiga þeir ökuleyfissviptingu yfir höfði sér. Tveimur til viðbótar var gert að hætta akstri sökum þess að þeir höfðu neytt áfengis en voru þó undir leyfilegum mörkum.

Lögreglan segir, að það hafi vakið athygli lögreglumanna að allmargir ökumenn nota ekki bílbelti. Slíkt komi nokkuð á óvart enda eigi öllum að vera ljóst mikilvægi þeirra.