Icelandic Group er eitt af fyrirtækjunum inni í Vestia. Golli / Kjartan Þorbjörnsson

Fjármálaráðuneytið skrifaði í morgun bréf til Bankasýslu ríkisins þar sem óskað var eftir eins tæmandi upplýsingum og kostur er á um aðdraganda sölu Landsbankans á eignarhaldsfélaginu Vestia til Framtakssjóðs Íslands. 

Þetta kom fram hjá Steingrími J. Sigfússyni, fjármálaráðherra, í utandagskrárumræðu á Alþingi um Vestia-málið svonefnda. Steingrímur sagði, að Bankasýslan hefði einnig verið beðin um að afla upplýsinga um hvaða sjónarmið hafi legið að baki sölunni, þá verkferla sem stuðst var við og eftir atvikum undanþágur, sem veittar voru frá meginreglum um opið söluferli. Loks var Bankasýslan beðin um upplýsingar um það hvernig Landsbankinn hyggist beita sér fyrir því að samskonar reglum verði fylgt við sölu fyrirtækja út úr Vestia.

Umræðan fór fram að ósk Guðlaugs Þórs Þórðarsonar, þingmanns Sjálfstæðisflokks, sem sagði að hugsanlega væri um að ræða stærstu einkavæðingu Íslandssögunnar og skortur á upplýsingum um söluferlið og síðan sölu á fyrirtækjum út úr Vestia væri uppskrift að tortryggni.

Guðlaugur Þór spurði Steingrím m.a. hvers vegna hann hefði ekki staðið við þau orð sín, sem hann lét falla í nóvember, að Bankasýslan muni beina þeim tilmælum til Framtakssjóðs að hann viðhafi verklagsreglurnar eins og bankinn ætti í hlut þegar að því kæmi, að fyrirtækin innan Vestia verði skráð á markað eða seld.

Steingrímur sagðist telja að staðið hafi verið við það sem að fjármálaráðuneytinu snéri. Þá sagði hann, að Framtakssjóðurinn og Vestia hefðu látið opinberlega í ljós áhuga á að fá samstarfsaðila að rekstri Icelandic Group, sem nú er innan Vestia. Í framhaldinu hefðu allmargir aðilar snúið sér til Framtakssjóðsins og eða Icelandic og lýst áhuga sínum og síðan hafi farið fram viðræður við einn þeirra aðila, fjárfestingarsjóðinn Triton, um möguleg kaup hans á eignum út úr Icelandic.

Krefst upplýsinga um söluverð

Guðlaugur Þór spurði  hvort Steingrímur muni upplýsa um söluverð á þeim fyrirtækjum sem voru seld yfir til Framtakssjóðs frá Landsbankanum og sagði það grundvallaratriði. Steingrímur sagðist ekki kannast við, að upplýsingar  um verð í þessum viðskiptum hafi ekki verið veittar. Fram hefði komið skýrt fram í skriflegu svari til Guðlaugs Þórs á Alþingi, að verðið var 15,5 milljarðar króna. Landsbankinn haldi eftir 19% hlut í Icelandic Group og eignist 25% hlut í Framtakssjóðnum. Jafnframt hafi komið fram að hlutafé Icelandic Group hafi verið metið 13,9 milljarðar og samanlagt verðmæti annarra fyrirtækja innan Vestia 4,25 milljarðar.

Sagði Steingrímur, að Bankasýslan hefði farið yfir þetta mál og niðurstaðan væri, að viðskiptin hafi verið hagstæð fyrir Landsbankann.

Guðlaugur Þór sagðist hafa spurt Steingrím einfaldra spurninga, um hvort fara ætti eftir reglum í einkavæðingunni og hvort segja ætti almenningi frá söluverðinu.  Samt hefði Steingrímur leyft sér að segja, að svarið sem fjármálaráðuneytið gaf um söluverðið á Vestia væri fullnægjandi þótt upplýsingar hefði skort um skuldir og söluverð á einstökum félögum. 

„Sem þýðir að þannig eiga málin að vera," sagði Guðlaugur Þór og sagðist hvetja stjórnarliða til að koma í veg fyrir það því annars yrði aldrei friður eða traust í íslensku viðskiptalífi.

Ekki það opna söluferli sem ég hefði viljað sjá

Steingrímur sagði mikilvægt að ala ekki á tortryggni í samfélaginu. Þá sagði hann, að það orkaði tvímælis að tala um einkavæðingu því um væri að ræða einkafyrirtæki, sem lentu í erfiðleikum og viðskiptabanki viðkomandi fyrirtækja væri að reyna að endurskipuleggja þau.

Þá sagði Steingrímur að Framtakssjóðurinn væri í sjálfu sér ekki viðræðuaðili í söluviðræðum, sem nú stæðu yfir heldur fyrirtækið Icelandic, sem væri að selja út úr sínum efnahag tilteknar eignir í útlöndum.

„Ég vil hins vegar segja það hér skýrt: Þetta er ekki það opna söluferli, eða tilboðsferli sem ég hefði kosið að Framtakssjóður hefði viðhaft. Það ber að leggja á það áherslu, að í framtíðinni verði öðruvísi að þessum hlutum staðið. Við skulum svo bíða og sjá hvort yfir höfuð verði um nokkra sölu að ræða og þá hafa menn tækifæri til að bæta ráð sitt," sagði Steingrímur J. Sigfússon.