„Við gerum okkur miklar vonir um að þessi dómur sé fordæmisgefandi. Þetta getur skipt okkur alveg gríðarlega miklu máli,“ segir Reimar Marteinsson, formaður félags stofnfjárhafa í fyrrum Sparisjóði Húnaþings og Stranda.

Héraðsdómur Reykjavíkur sýknaði í dag tvo stofnfjáreigendur í Sparisjóði Norðlendinga í innheimtumálum sem Íslandsbanki höfðaði.

Um fimmta hvert heimili í Húnaþingi vestra og Bæjarhreppi stendur frammi fyrir alvarlegum fjárhagsvanda eða jafnvel persónulegum gjaldþrotum vegna skuldsettra kaupa á stofnfé í Sparisjóði Húnaþings og Stranda.

Sparisjóðurinn rann saman við Sparisjóð Keflavíkur árið 2007, en áður en gengið var frá sameiningunni var ákveðið að styrkja stöðu Sparisjóðs Húnaþings og Stranda. Stofnfé sjóðsins hafði fyrir þann tíma verið tæpar tvær milljónir króna, en eftir aukningu var stofnfé tveir milljarðar.

Spurningar vakna því um hvort sýknudómarnir í Héraðsdómi Reykjavíkur geti verið fordæmisgefandi fyrir fyrrverandi stofnfjárhafa í Sparisjóði Húnaþings og Stranda.

„Þetta er eitthvað sem við erum búin að vera að bíða eftir og lögfræðingarnir okkar eru að skoða hvort þetta sé ekki eitthvað sem heimfærist yfir á okkar mál. Þetta getur skipt okkur alveg gríðarlega miklu máli,“ segir Reimar.

Hann segist þekkja málavexti að einhverju leyti en honum sýnist að málið fyrir norðan hafi verið sótt á sama grunni og stofnfjárhafar í Húnaþingi myndu gera. Aðalspurningin væri hvað gögn menn hefðu að baki sér. Þetta séu mál sem væru sótt á sömu forsendum.

„Lögfræðingar eru að meta þessa dóma út frá okkar forsendum. Þeir skila okkur áliti fljótlega,“ segir hann.

Í sveitarfélögunum tveimur, Húnaþingi vestra og Bæjarhreppi, búa um 1200 manns og af þeim voru um 200 stofnfjáreigendur í sparisjóðnum. Um 140 eigendur tóku lán vegna stofnfjáraukningarinnar.