Afar erfið staða ríkir í barnagæslumálum í Reykjavík Ásdís Ásgeirsdóttir

„Ástandið núna er það versta sem ég hef kynnst, þegar fólk er farið að koma og banka upp á og spyrja hvort ég geti reddað því og tekið að mér aukabarn,“ segir Agnes Friðriksdóttir, dagmóðir og gjaldkeri Barnavistunar, félags dagforeldra í viðtali við Morgunblaðið í dag.

Afar erfið staða ríkir í barnagæslumálum í Reykjavík og eru margir foreldrar í stökustu vandræðum með að koma börnum sínum að hjá dagforeldrum. Keðjuverkun ríkir því árgangurinn sem byrja á í leikskóla í haust er óvenjustór og útlit fyrir að leikskólapláss vanti fyrir um 400 börn.

Stjórn Barnavistunar er afar ósátt við vinnubrögð borgarstjórnar. Í ályktun frá félaginu kemur fram að innleiðing heimgreiðslu til foreldra í október 2008 hafi leitt til þess að börnum sem send voru til dagforeldra fækkaði mjög og varð það til þess að um 70 dagforeldrar hættu störfum. Að sögn Agnesar varð hins vegar hvellur síðasta haust vegna barna í stóra kreppuárganginum 2008, en dagforeldrum hefur ekki fjölgað aftur. Nú hefur svo verið ákveðið að hætta heimgreiðslunum.

Segja Oddnýju hafa farið með rangt mál

„Þetta ástand kemur dagforeldrum ekkert á óvart enda vöruðum við ítrekað við því. Þessi börn fæddust fyrir tveimur árum svo þetta er búið að vera lengi í uppsiglingu,“ segir Sigrún Edda Lövdal dagmóðir. Þær Sigrún og Agnes segja að Oddný Sturludóttir, borgarfulltrúi Samfylkingar, hafi farið með rangt mál þegar hún sagði dagforeldra að meðaltali hafa hjá sér þrjú börn. Langflestir annist fimm börn, sem er löglegt hámark, þótt þau séu kannski ekki á skrá hjá borgaryfirvöldum þar sem sum séu frá nágrannabæjarfélögum.

„Dagforeldrar eru allir af vilja gerðir og við hreinlega krefjumst þess að Reykjavíkurborg semji við okkur og reyni að finna lausn á vanda foreldra, því úrræðaleysið virðist vera algjört.“

Hér má finna ályktun Barnavistunar