Lögð hefur verið fram þingsályktunartillaga á Alþingi um að sértakt átak verði gert til að auka fræðslu um legslímuflakk og að skoðaður verði möguleiki á stofnun göngudeildar fyrir konur með þennan sjúkdóm.

Eygló Harðardóttir, þingmaður Framsóknarflokksins, er fyrsti flutningsmaður tillögunnar. Í greinargerð kemur fram, að legslímuflakk sé krónískur, sársaukafullur sjúkdómur sem orsakist af því að frumur úr innra lagi legsins finnast á öðrum stöðum í kviðarholinu en legholinu. Sjúkdómurinn sé meðfæddur og virðist að verulegu leyti háður erfðum.

Talið er að um 2–5% stúlkna og kvenna hér á landi þjáist af sjúkdómnum einhvern tímann á frjósemisskeiði og því sé ljóst að um töluverðan fjölda er að ræða. Á 20 ára tímabili greindust um 1400 konur með sjúkdóminn á Íslandi og þar var í meiri hluta tilvika um að ræða talsvert alvarleg sjúkdómsform. Því megi reikna með að á hverjum tíma eigi nokkur hundruð kvenna í vanda vegna sjúkdómsins hér á landi, en hjá mörgum þeirra greinist sjúkdómurinn seint og ekki fyrr en óafturkræfar vefjaskemmdir hafa orðið.

Þingsályktunartillagan í heild