Julian Assange og Kristinn Hrafnsson, tveir helstu forsvarsmenn WikiLeaks. Reuters

Fyrirtæki, sem greiðslukortafyrirtækið Visa fól að rannsaka fjármál uppljóstrunarvefjarins WikiLeaks, fann engar vísbendingar um að vefurinn og fyrirtæki hans á Íslandi hefði brotið lög.

Talsmaður Visa segir við AP fréttastofuna, að fyrirtækið muni engu að síður áfram hindra að fjárframlögum verði komið til WikiLeaks gegnum Visa þar til rannsókninni er formlega lokið.

Átta vikur eru liðnar frá því Visa fól norska fjármálaþjónustufyrirtækinu Teller AS að rannsaka hvort WikiLeaks og fjáröflunarfyrirtækið Sunshine Press, sem er skráð á Íslandi, hefði brotið lög.

Visa var eitt af nokkrum bandarískum fyrirtækjum, sem lokuðu fyrir viðskipti við WikiLeaks eftir að vefurinn hóf að birta bandaríska sendiráðspósta í lok síðasta árs.

AP fréttastofan segist hafa undir höndum bréf, sem Peter Wiren, forstjóri Teller, hefur skrifað til íslensks þingmanns. „Lögmenn okkar hafa nú lokið störfum og þeir fundu engar vísbendingar um að Sunshine Press... starfi í andstöðu við reglur Visa eða íslensk lög," segir í bréfinu. 

Bréfið, sem er tvær blaðsíður, er dagsett 30. desember. Segir AP að Teller hafi staðfest að hann hafi skrifað það.  

Wiren segir að ekkert sé því til fyrirstöðu að Teller afgreiði greiðslur til WikiLeaks - svo framarlega sem Visa samþykki það.