Merki SFR, Stéttarfélags í almannaþjónustu.

Samninganefnd SFR og samninganefnd ríkisins funduðu í gær. Einn af áhersluþáttum SFR, sem félagið lagi fram, er að samningar verði gerðir til 18 til 24 mánaða. Með þeim hætti væri hægt að vinna að nauðsynlegum stöðuleika til hæfilegs tíma, en binda kjarasamninga ekki of langt inn í framtíðina í því óvissa ástandi sem nú ríkir í rekstrarumhverfi ríkisins.

Einnig telur samninganefnd SFR það ekki þjóna hagsmunum launþega að gera skemmri samninga en til 18 mánaða.
 
Í tilkynningu frá SFR segir að á samningafundinum hafi einnig lagðar fram hugmyndir um launahækkanir sem tæki mið af ólíkum aðferðum. Þannig yrði lögð áhersla á krónutöluhækkanir á árinu 2011. Á árinu 2012 yrði síðan um prósentuhækkanir að ræða ásamt mögulegum krónutöluhækkunum. Á því ári myndi ný launatafla einnig líta dagsins ljós og stofnanasamningar yrðu endurnýjaðir.
 
Með þessari leið tækist að ná utan um marga áhersluþætti um lagfæringar á kaupmætti að mati samninganefndar SFR. Með krónutöluhækkun næðist að vinna að því markmiði að leggja áherslu á leiðréttingu lægstu launa, en prósentuhækkun myndi vinna að kaupmáttarleiðréttingu fyrir alla félagsmenn.
 
„Launatafla félagsins þarfnast endurnýjunar í ljósi þeirra samninga sem gerðir voru 2008 og 2009. Því er nauðsynlegt að vinna að breytingu á henni. Stofnanasamningar kalla einnig á endurnýjun og endurgerð. Ýmsar breytingar hafa átt sér stað í umhverfi ríkisstarfsmanna á undarförnum árum sem þarfnast skilgreiningar í stofnanasamningum. Því er afar brýnt að taka þá samninga upp ekki síðar en á tímabilinu 2011 til 2012.
 
Samninganefnd SFR hvetur ríkisvaldið til að taka nú afgerandi forystu í gerð kjarasamninga. Á almennum markaði hafa launþegar fylgst með þrætum aðila og ótrúlegum tilburðum við að binda kjarasamningsgerð við heimtufrekju atvinnurekenda. Slíku ofbeldi hafnar SFR og væntir þess að ríkisstjórn Íslands stígi ákveðið fram í samningagerðinni,“ segir í tilkynningu.