Margir voru forvitnir að smakka á japönskum mat á Háskólatorgi í dag. Mbl.is/Kristinn Ingvarsson

Austurlenskur andi svífur yfir vötnum í Háskóla Íslands í dag þar sem Japanshátíð stendur yfir. Gestum Japanshátíðar er boðið að kynna sér japanskt líf og menningu í fjölbreyttum kynningum og fyrirlestrum á Háskólatorgi.  Meðal annars má gæða sér á japanskr matargerðarlist, kynna ér skrautritun og japanskt pappírsbrot (origami). Gestum er einnig boðið í ekta japanska teathöfn og að smakka á því sem þar er borið fram.

Fram kemur á vef HÍ að eitt af sérkennum Japanshátíðarinnar sé að flest allt það sem gestum og gangandi er boðið að sjá er unnið og fram borið af nemendum í japönsku máli og menningu. Nemendurnir hafa lagt nótt við dag til þess að hátíðin megi verða sem glæsilegust. Félagsskapur fólks af japönskum uppruna á Íslandi hefur einnig lagt hönd á plóg og stendur meðal annars fyrir japanskri teathöfn, japönskum blómaskreytingum og kynningu á Budo (bardagaíþróttum). 

Einnig geta gestir kynnt sér japanska borðspilið Igo. Óáfengur karaokebar er opinn fyrir gesti ásamt því að sýndar eru japanskar bíómyndir og sjónvarpsþættir. Á hátíðinni er einnig boðið upp á fræðslu um japanska poppmúsík (J-pop), tölvuleiki auk anime og manga. 

Á aðalsviði hátíðarinnar fer fram líka létt spurningakeppni um Japan og japanska menningu. Hljómsveit sem samansett er af nemendum flytur ekta japanska popptónlist og skemmtir gestum. Í ár verður einnig sýnikennsla í því hvernig klæðast skal Kimono (Kimono Kitsuke) á aðalsviðinu að ógleymdri sýnikennslu í Budo. Allir viðburðir hátíðarinnar lúta lögmálinu „fyrstur kemur fyrstur fær".

Hátíðin, sem hófst klukkan 13, er öllum opin og stendur til kl. 18 í dag.