Stjórn Heimdallar hefur sent frá sér ályktun þar sem segir að ef formaður og þingmenn Sjálfstæðisflokksins taka þátt í að samþykkja kröfur Breta og Hollendinga vegna Icesave, sé nauðsynlegt að halda landsfund sem fyrst til að kanna umboð formannsins.

Stjórn Heimdallar sendi ályktunina frá sér í kvöld í kjölfar afstöðu þingmanna Sjálfstæðisflokksins vegna Icesave-samkomulagsins. Yfirskrift ályktunarinnar er: „Hugsanlegt að kanna þurfi umboð formanns“

„Stjórn Heimdallar, félags ungra sjálfstæðismanna í Reykjavík, lýsir yfir alvarlegum áhyggjum af þeirri afstöðu sem felst í áliti fulltrúa Sjálfstæðisflokksins í fjárlaganefnd hvað varðar Icesave samninginn. Þeir hafa lagt til að samningurinn verði samþykktur og Bjarni Benediktsson, formaður flokksins, hefur tekið undir þá skoðun,“ segir í ályktun Heimdallar.

„Ljóst er að sjálfstæðismenn hafa hingað til tekið harða afstöðu gegn hvers konar uppgjöf gegn kröfum Breta og Hollendinga. Landsfundur Sjálfstæðisflokksins ályktaði á þá leið 2010 að hafna bæri löglausum kröfum þeirra.

Í ljósi þeirrar skýru afstöðu sem landsfundur Sjálfstæðisflokksins tók gegn Icesave kröfunum, er ljóst að ef formaður og þingmenn Sjálfstæðisflokksins taka þátt í að samþykkja þær kröfur er nauðsynlegt að halda landsfund sem fyrst til að kanna umboð formannsins.

Stjórn Heimdallar vonar að sjálfstæðismenn standi saman gegn löglausum kröfum Breta og Hollendinga, nú sem áður,“ segir í ályktun Heimdallar.