Eitt af duflunum sem Gæslan eyddi með því að nota dínamít og plastsprengiefni mynd/Landhelgisgæslan

Sprengjusveit Landhelgisgæslunnar eyddi í vikunni tveimur tundurduflum sem fundust á Héraðssandi um síðustu helgi, en tilkynning barst til stjórnstöðvar Landhelgisgæslunnar um fjögur dufl.

Fram kemur á vef Gæslunnar að í kjölfarið hafi verið sendar myndir sem sprengjusérfræðingar hafi greint sem tundurdufl frá seinni heimsstyrjöldinni, með hugsanlegri sprengjuhleðslu.

Tvö dufl reyndust vera tóm en sprengiefni var í hinum tveimur. Um hundrað kíló í öðru og um fimmtíu kíló í hinu.

Landhelgisgæslan hefur gert um 5000 tundurdufl óvirk af þeim rúmlega 100 þúsund sem Bretar lögðu úti fyrir Austfjörðum í seinni heimstyrjöldinni. Áttu duflin að að loka siglingaleið þýskra kafbáta út á Atlantshafið.